| ᠪᠢ ᠭᠤᠴᠢᠨ ᠨᠠᠢᠮᠠᠨ ᠵᠢᠯ ᠭᠡᠭᠡᠨ ᠳᠦᠷᠢ ᠶᠢ ᠨᠢ ᠪᠠᠷᠠᠳᠠᠵᠤ ᠶᠠᠪᠤᠭᠰᠠᠨ ᠨᠢᠭᠡᠨ ᠰᠠᠶᠢᠬᠠᠨ ᠬᠥᠮᠥᠨ ᠢ ᠨᠡᠬᠡᠨ | ᠳᠤᠷᠠᠰᠴᠤ ᠰᠠᠭᠤᠨᠠ᠃ ᠡᠨᠡ ᠬᠥᠮᠥᠨ ᠨᠠᠷᠠᠳᠤ ᠳᠤ ᠲᠠᠯᠠᠨ ᠵᠢᠯ ᠤᠨ ᠬᠠᠪᠤᠷ ᠨᠠᠮᠤᠷ ᠢ ᠰᠠᠯᠬᠢ ᠰᠢᠭ᠋ | ᠲᠣᠭᠤᠯᠬᠤ ᠳᠠᠭᠠᠨ ᠨᠠᠮᠠ ᠳᠤ ᠭᠤᠴᠢᠨ ᠨᠠᠢᠮᠠᠨ ᠵᠢᠯ ᠤᠨ ᠠᠵᠠ ᠵᠢᠷᠭᠠᠯ ᠬᠠᠶᠢᠷᠠᠯᠠᠭᠰᠠᠨ ᠶᠤᠮ᠃ ᠬᠥᠮᠥᠨ ᠤ | ᠠᠮᠢᠳᠤᠷᠠᠯ ᠳᠤ ᠬᠡᠳᠦᠨ ᠭᠤᠴᠢᠨ ᠨᠠᠢᠮᠠᠨ ᠵᠢᠯ ᠪᠠᠶᠢᠳᠠᠭ ᠪᠣᠯ︖ ᠡᠨᠡ ᠭᠤᠴᠢᠨ ᠨᠠᠢᠮᠠᠨ ᠵᠢᠯ ᠳᠤ ᠪᠢ | ᠶᠢᠷᠲᠢᠨᠴᠦ ᠶᠢᠨ ᠬᠠᠮᠤᠭ ᠤᠨ ᠪᠠᠶᠠᠨ ᠬᠥᠮᠥᠨ ᠶᠠᠪᠤᠭᠰᠠᠨ ᠨᠢ ᠦᠨᠡᠨ᠃ ᠨᠠᠮᠠᠶᠢ ᠬᠠᠶᠢᠷᠠᠯᠠᠵᠤ᠂ ᠬᠠᠮᠠᠭᠠᠯᠠᠵᠤ᠂ | ᠰᠤᠷᠭᠠᠵᠤ᠂ ᠵᠢᠷᠭᠠᠬᠤ ᠴᠠᠭ ᠲᠤᠨᠢ ᠪᠠᠶᠠᠷᠯᠠᠵᠤ᠂ ᠵᠣᠪᠠᠭ᠋ᠤ ᠴᠠᠭ ᠲᠤᠨᠢ ᠵᠣᠪᠠᠵᠤ ᠶᠠᠪᠤᠭᠰᠠᠨ ᠡᠨᠡ ᠬᠥᠮᠥᠨ ᠲᠠᠢ ᠪᠢ | ᠪᠠᠰᠠ ᠣᠯᠠᠨ ᠣᠯᠠᠨ ᠭᠤᠴᠢᠨ ᠨᠠᠢᠮᠠᠨ ᠵᠢᠯ ᠢ ᠬᠠᠮᠲᠤ ᠲᠣᠭᠤᠯᠣᠶᠠ ᠭᠡᠵᠦ ᠪᠡᠶᠡ ᠰᠡᠳᠬᠢᠯ ᠢᠶᠠᠷ ᠢᠶᠠᠨ ᠬᠦᠰᠡᠨ | ᠴᠢᠷᠮᠠᠶᠢᠭᠰᠠᠨ ᠪᠤᠯᠪᠠᠴᠣ ᠁ | ᠡᠨᠡ ᠬᠥᠮᠥᠨ ᠮᠢᠨᠤ ᠠᠪᠤ ᠪᠠᠶᠢᠯᠠ᠃ | ᠲᠡᠷᠡ ᠵᠢᠯ ᠤᠨ ︽ᠠᠯᠳᠠᠨ ᠭᠠᠨᠳᠠᠷᠢ︾ ᠰᠡᠳᠬᠦᠯ ᠳᠡᠭᠡᠷᠡ ᠪᠢ ᠪᠤᠷᠬᠠᠨ ᠤ ᠣᠷᠣᠨ ᠢ ᠵᠣᠷᠢᠵᠤ ᠶᠠᠪᠤᠭᠰᠠᠨ | ᠠᠪᠤ ᠶᠢᠨ ᠢᠶᠠᠨ ᠲᠤᠬᠠᠢ ︽ᠴᠠᠰᠤᠲᠤ ᠠᠯᠲᠠᠢ ᠶᠢᠨ ᠨᠣᠶᠠᠨ ᠰᠠᠷᠢᠳᠠᠭ︾ ᠭᠡᠰᠡᠨ ᠤᠷᠲᠤᠬᠠᠨ ᠨᠠᠶᠢᠷᠠᠭᠤᠯᠤᠯ ᠪᠢᠴᠢᠵᠦ | ᠨᠡᠶᠢᠲᠡᠯᠡᠭᠦᠯᠵᠦ ᠠᠪᠤ ᠪᠠᠨ ᠳᠤᠷᠠᠰᠤᠯᠠ᠃ ᠯᠠᠪᠰᠠᠯᠠᠨ ᠣᠷᠣᠬᠤ ᠴᠠᠰᠤ ᠶᠢ ᠴᠣᠩᠬᠤ ᠪᠠᠷ ᠬᠠᠷᠠᠨ ᠪᠢᠷ ᠴᠠᠭᠠᠰᠤ | ᠬᠤᠶᠠᠷ ᠢ ᠨᠡᠶᠢᠯᠡᠭᠦᠯᠵᠦ ᠰᠠᠭᠤᠬᠤ ᠳᠤ ᠪᠤᠳᠤᠯ ᠬᠦᠨᠳᠦ᠃ ᠪᠥᠵᠢᠨ ᠤᠨᠠᠬᠤ ᠴᠠᠰᠤᠨ ᠰᠢᠷᠬᠡᠭ ᠤᠨ ᠲᠤᠭᠠ ᠪᠠᠷ | ᠰᠠᠨᠠᠯᠠ ᠭᠡᠪᠡᠯ ᠬᠤᠳᠠᠯ ᠪᠢᠰᠢ᠃ | ᠴᠠᠰᠤᠨ ᠰᠢᠷᠬᠡᠭ ᠤᠨ ᠲᠤᠭᠠ ᠪᠠᠷ ᠪᠤᠳᠣᠯ ᠳᠤ ᠨᠡᠪᠴᠢᠨ ᠢᠷᠡᠬᠦ ᠲᠡᠷᠡ ᠣᠯᠠᠨ ᠳᠤᠷᠠᠳᠬᠠᠯ ᠠᠴᠠ ᠪᠢ | ᠠᠪᠤ ᠶᠢᠨ ᠢᠶᠠᠨ ᠲᠡᠷᠡ ᠤᠳᠠᠭᠠᠨ ᠤ ᠦᠯᠢᠭᠡᠷ ᠦᠢᠯᠡ ᠶᠢ ᠰᠠᠨᠠᠬᠤ ᠪᠦᠷᠢ᠂ ᠠᠪᠤ ᠮᠢᠨᠢ ᠲᠡᠭᠡᠵᠦ ᠨᠢᠭᠡ ᠬᠡᠯᠡᠭᠰᠡᠨ | ᠦᠭᠡᠢ ᠪᠣᠯ ᠮᠢᠨᠤ ᠥᠨᠥᠳᠥᠷ ᠤᠨ ᠠᠵᠠ ᠵᠢᠷᠭᠠᠯᠲᠤ ᠠᠮᠢᠳᠤᠷᠠᠯ ᠪᠠᠶᠢᠳᠠᠭ ᠪᠣᠯᠪᠠ ᠦᠦ︖ ᠭᠡᠵᠦ ᠪᠤᠳᠤᠳᠠᠭ᠃ | ᠲᠡᠭᠡᠵᠦ ᠪᠤᠳᠤᠬᠤ ᠪᠦᠷᠢ ᠦᠷᠡ ᠬᠡᠦᠬᠡᠳ ᠪᠣᠯᠣᠭᠰᠠᠳ ᠤᠨ ᠰᠡᠳᠬᠢᠯ ᠰᠠᠨᠠᠭᠠᠨ ᠳᠤ ᠠᠪᠤ ᠡᠵᠢ ᠬᠤᠶᠠᠷ ᠤᠨ | ᠬᠥᠮᠥᠵᠢᠭᠦᠯᠦᠯ ᠬᠡᠳᠦᠢ ᠴᠢᠬᠤᠯᠠ ᠪᠠᠶᠢᠳᠠᠭ ᠢ᠂ ᠬᠡᠳᠦᠢ ᠥᠨᠳᠥᠷ ᠪᠠᠶᠢᠳᠠᠭ ᠢ ᠣᠶᠢᠯᠠᠭᠠᠬᠤ ᠪᠦᠷᠢ᠄ ︽ᠠᠪᠤ ᠴᠢᠨᠢ | ᠶᠡᠭᠡ ᠠᠮᠠᠷ ᠦᠭᠡᠢ ᠬᠥᠮᠥᠨ ᠪᠠᠶᠢᠭᠰᠠᠨ︕︾ ᠭᠡᠵᠦ ᠬᠥᠮᠥᠰ ᠤᠨ ᠬᠡᠯᠡᠭᠰᠡᠨ ᠦᠭᠡ ᠰᠠᠨᠠᠭᠳᠠᠨᠠ᠃ | ᠭᠤᠷᠪᠠᠳᠤᠭᠠᠷ ᠣᠨ ᠤ ᠵᠣᠨ ᠤ ᠠᠮᠠᠷᠠᠯᠲᠠ ᠶᠢᠨ ᠡᠳᠦᠷ ᠬᠤᠨᠤᠭ ᠢ ᠣᠲᠣᠷ ᠳᠡᠭᠡᠷᠡ ᠥᠩᠭᠡᠷᠡᠭᠦᠯᠦᠭᠰᠡᠨ | ᠲᠡᠷᠡ ᠵᠢᠯ ᠤᠨ ᠨᠠᠮᠤᠷ᠂ ᠪᠢ ᠳᠥᠷᠪᠡᠳᠦᠭᠡᠷ ᠣᠨ ᠳᠤ ᠲᠡᠪᠰᠢᠨ ᠣᠷᠣᠬᠤ ᠪᠣᠯᠵᠤ᠂ ᠠᠪᠤ ᠨᠠᠮᠠᠶᠢ ᠰᠤᠷᠭᠠᠭᠤᠯᠢ ᠳᠤ | ᠬᠦᠷᠭᠡᠬᠦ ᠪᠣᠯᠣᠯᠠ᠃ ᠰᠤᠷᠭᠠᠭᠤᠯᠢ ᠳᠤ ᠶᠠᠪᠤᠬᠤ ᠥᠷᠯᠥᠭᠡ ᠲᠡᠭᠷᠢ ᠰᠠᠶᠢᠬᠠᠨ ᠪᠠᠶᠢᠭᠰᠠᠨ ᠴᠣ᠋ ᠮᠢᠨᠤ ᠰᠡᠳᠬᠢᠯ ᠳᠤ | ᠬᠠᠷᠠᠩᠭᠤᠢ᠃ ᠪᠢ ᠦᠭᠡ ᠳᠠᠭᠤ ᠦᠭᠡᠢ᠂ ᠣᠭᠢᠯᠠᠭᠠᠳ ᠪᠠᠶᠢᠪᠠ᠃ ᠭᠡᠷ ᠲᠤ ᠮᠢᠨᠤ ᠮᠡᠭᠰᠢᠨ ᠣᠭᠢᠯᠠᠬᠤ ᠠᠴᠠ | ᠥᠭᠡᠷᠡ ᠴᠢᠮᠡᠭᠡ ᠠᠨᠢᠷ ᠠᠯᠠᠭᠠ᠃ | ︽ᠵᠠ᠂ ᠶᠠᠪᠤᠶᠠ︕︾ ᠭᠡᠵᠦ ᠠᠪᠤ ᠥᠭᠦᠯᠡᠭᠡᠳ ᠮᠢᠨᠤ ᠪᠣᠭᠴᠣ ᠡᠨᠡ ᠲᠡᠷᠡ ᠶᠢ ᠠᠪᠤᠭᠠᠳ ᠭᠠᠷᠪᠠ᠃ | ︽ᠵᠠ᠂ ᠬᠦᠦ ᠮᠢᠨᠢ ᠰᠤᠷᠭᠠᠭᠤᠯᠢ ᠳᠠᠭᠠᠨ ᠶᠠᠪᠤ᠃ ᠡᠵᠢ ᠨᠢ ᠮᠠᠯ ᠤᠨ ᠬᠤᠶᠢᠨᠠ ᠠᠴᠠ ᠭᠠᠷᠤᠯᠠ᠃ ᠬᠤᠶᠠᠷ | ᠳᠡᠭᠦᠦ ᠴᠢᠨᠢ ᠢᠰᠢᠭᠡ ᠬᠤᠷᠠᠭᠠ ᠪᠠᠨ ᠪᠡᠯᠴᠢᠭᠡᠭ︕︾ ᠭᠡᠵᠦ ᠡᠵᠢ ᠵᠠᠬᠢᠭᠠᠳ ᠶᠠᠪᠤᠴᠢᠬᠠᠯᠠ᠃ | ᠬᠤᠶᠠᠷ ᠳᠡᠭᠦᠦ ᠨᠠᠮᠠᠶᠢ ᠪᠠᠭ᠋ᠠᠨ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠢᠶᠠᠨ ᠬᠤᠶᠢᠨᠠ ᠬᠤᠶᠢᠨᠠ ᠠᠴᠠ ᠪᠠᠨ ᠴᠤᠪᠤᠷᠠᠯᠳᠤᠨ | ᠭᠠᠷᠤᠯᠠ᠃ ᠪᠢ ᠭᠡᠷ ᠲᠤ ᠭᠠᠭᠴᠠᠭᠠᠷ ᠦᠯᠡᠳᠡᠴᠢᠬᠡᠪᠡ᠃ ᠣᠲᠣᠷ ᠤᠨ ᠪᠠᠶᠢᠰᠢᠩ ᠴᠣ᠋ ᠭᠡᠰᠡᠨ ᠶᠠᠭᠤ ᠪᠦᠭᠦᠨ | ᠨᠢᠳᠦᠨ ᠳᠤ ᠳᠤᠯᠠᠭᠠᠬᠠᠨ᠃ ᠠᠳᠡ ᠰᠠᠭᠤᠭᠠᠳ ᠪᠠᠶᠢᠮᠠᠷ ᠰᠠᠨᠠᠭᠳᠠᠨᠠ᠃ ᠲᠡᠭᠡᠵᠦ ᠪᠠᠶᠢᠲᠠᠯᠠ ᠠᠪᠤ ᠶᠢᠨ ᠮᠠᠯ | ᠲᠠᠭᠤᠬᠤ ᠴᠢᠮᠡᠭᠡ ᠲᠣᠭᠤᠯᠳᠠᠯᠠ᠃ ᠰᠤᠷᠭᠠᠭᠤᠯᠢ ᠶᠢᠨ ᠬᠢᠨ ᠮᠠᠨ ᠤ ᠬᠢ ᠠᠴᠠ ᠠᠷᠪᠠᠨ ᠮᠠᠯ ᠠᠪᠤᠭᠰᠠᠨ ᠢ ᠪᠠᠰᠠ | ᠬᠦᠷᠭᠡᠨᠡ ᠰᠢᠣ᠃ | ᠪᠢ ᠶᠠᠭᠠᠷᠠᠨ ᠭᠠᠷᠤᠯᠠ᠃ ᠡᠵᠢ ᠪᠠᠶᠢᠭᠰᠠᠨ ᠪᠣᠯ ᠪᠠᠰᠠ ᠴᠢᠷᠭᠠᠯᠠᠮᠠᠷ ᠰᠠᠨᠠᠭᠳᠠᠭᠰᠠᠨ ᠴᠣ᠋ ᠡᠵᠢ ᠪᠢᠰᠢ᠂ ᠠᠪᠤ | ᠶᠠᠪᠤᠭᠠ ᠰᠢᠣ᠄ | ︽ᠬᠡᠦᠬᠡ ᠠ᠋︕ ᠣᠨᠤᠭᠠ ᠪᠠᠨ ᠣᠨᠣ᠃ ᠠᠪᠤ ᠨᠢ ᠮᠠᠯ ᠲᠠᠭᠤᠶᠠ︾ ᠭᠡᠵᠦ ᠥᠭᠦᠯᠡᠭᠰᠡᠨ ᠠᠪᠤ ᠬᠡᠳᠦᠨ | ᠮᠠᠯ ᠲᠠᠢ ᠪᠠᠨ ᠨᠣᠴᠣᠯᠳᠤᠨᠠ᠃ ᠲᠥᠯ ᠤᠨ ᠬᠤᠶᠢᠨᠠ ᠠᠴᠠ ᠭᠠᠷᠤᠭᠰᠠᠨ ᠬᠤᠶᠠᠷ ᠳᠡᠭᠦᠦ ᠶᠢᠨ ᠤᠬᠤᠷᠢᠨ ᠶᠠᠪᠤᠭᠠ | ᠬᠠᠷᠠᠭᠳᠠᠨᠠ᠃ ᠪᠢᠳᠠ ᠬᠡᠨ ᠠᠯᠢᠨ ᠠᠴᠠ ᠰᠠᠯᠬᠤ ᠳᠤᠷᠠ ᠦᠭᠡᠢ ᠪᠠᠶᠢᠭᠰᠠᠨ ᠴᠣ᠋ ᠁ ᠮᠢᠨᠤ ᠨᠢᠯᠪᠤᠰᠤ ᠳᠠᠭᠢᠨ | ᠠᠰᠬᠠᠷᠠᠯᠠ᠃ | ᠣᠨᠤᠭᠠ ᠣᠨᠣᠭᠰᠠᠨ ᠪᠢ ᠰᠡᠭᠦᠯ ᠮᠤᠰᠬᠢᠵᠤ᠂ ᠮᠠᠯ ᠲᠠᠭᠤᠭᠰᠠᠨ ᠠᠪᠤ ᠬᠤᠰᠢᠭᠤᠴᠢᠯᠠᠵᠤ᠂ ᠪᠢᠳᠠ | ᠬᠤᠶᠠᠷ ᠤᠨ ᠬᠤᠭᠤᠷᠤᠨᠳᠣᠭᠢ ᠵᠠᠢ ᠣᠷᠳᠤᠰᠣᠬᠰᠠᠭᠠᠷ ᠪᠠᠶᠢᠪᠠ᠃ ᠡᠷᠭᠢᠨ ᠬᠠᠷᠠᠬᠤ ᠪᠦᠷᠢ ᠬᠤᠶᠠᠷ ᠳᠡᠭᠦᠦ ᠶᠢᠨ ᠪᠠᠷᠠ | ᠭᠡᠷ ᠤᠨ ᠬᠤᠶᠢᠲᠤ ᠣᠷᠣᠢ ᠳᠡᠭᠡᠷᠡ ᠬᠠᠳᠠᠭᠠᠰᠤᠲᠠᠢ᠃ ᠮᠢᠨᠤ ᠬᠤᠶᠢᠨᠠ ᠠᠴᠠ᠂ ᠰᠤᠷᠭᠠᠭᠤᠯᠢ ᠳᠤ ᠶᠠᠪᠤᠭᠰᠠᠨ | ᠠᠬᠠ ᠶᠢᠨ ᠬᠤᠶᠢᠨᠠ ᠠᠴᠠ ᠰᠡᠳᠬᠢᠯ ᠡᠮᠲᠡᠷᠡᠨ ᠦᠳᠡᠵᠦ ᠪᠠᠶᠢᠭᠠ ᠨᠢ ᠲᠡᠷᠡ᠃ ᠲᠥᠯ ᠡᠮᠦᠨᠡ ᠵᠦᠭ ᠲᠤ | ᠪᠡᠯᠴᠢᠭᠡᠭᠰᠡᠨ ᠴᠣ᠋ ᠡᠵᠢ ᠶᠢᠨ ᠪᠠᠷᠠ ᠠᠯᠲᠠᠷᠬᠠᠤ ᠪᠠᠷ ᠲᠥᠯ ᠢᠶᠠᠨ ᠡᠷᠭᠢᠭᠦᠯᠵᠦ ᠠᠪᠤ ᠪᠢᠳᠠ ᠬᠤᠶᠠᠷ ᠤᠨ ᠶᠠᠪᠤᠭᠰᠠᠨ | ᠵᠦᠭ ᠲᠤ ᠬᠠᠨᠳᠤᠭᠤᠯᠵᠤ ᠳ᠋ᠠ᠃ ᠦᠭᠦᠴᠡ ᠶᠢᠨ ᠴᠢᠯᠦᠭᠡ ᠪᠠᠷ ᠬᠠᠷᠢᠵᠤ ᠢᠷᠡᠬᠦ ᠳᠤ ᠬᠤᠶᠠᠷ ᠳᠡᠭᠦᠦ ᠮᠢᠨᠢ ᠨᠠᠮᠠᠶᠢ | ᠤᠭᠲᠤᠵᠤ ᠠᠪᠤᠭᠠᠳ᠄ | ︽ᠠᠬᠠ ᠶᠢ ᠳᠡᠭᠦᠵᠢᠩ ᠣᠪᠣᠭᠠ ᠪᠠᠷ ᠴᠠᠭᠠᠰᠢ ᠣᠷᠣᠨ ᠣᠷᠣᠲᠠᠯᠠ ᠪᠢᠳᠠ ᠬᠤᠶᠠᠷ ᠬᠤᠶᠢᠨᠠ ᠠᠴᠠ ᠴᠢᠨᠢ | ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠶᠤᠮ︾ ᠭᠡᠵᠦ ᠤᠶᠠᠷᠠᠨ ᠥᠭᠦᠯᠡᠵᠦ᠂ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠵᠤ ᠪᠢᠯᠡ᠃ | ᠳᠡᠭᠦᠵᠢᠩ ᠣᠪᠣᠭᠠ ᠣᠲᠣᠷ ᠤᠨ ᠭᠡᠷ ᠠᠴᠠ ᠪᠠᠷᠠᠭᠤᠨ ᠬᠤᠶᠢᠲᠤ ᠵᠦᠭ ᠲᠤ ᠰᠦᠮᠡᠯᠵᠡᠨ ᠬᠠᠷᠠᠭᠳᠠᠳᠠᠭ | ᠥᠨᠳᠥᠷ ᠣᠷᠣᠢ᠃ ᠲᠡᠭᠦᠨ ᠤ ᠴᠠᠭᠠᠳᠠᠢ ᠠᠭᠤᠯᠵᠠᠷ ᠭᠠᠴᠠᠭᠠᠨ ᠤ ᠲᠥᠪ ᠬᠠᠷᠠᠭᠳᠠᠳᠠᠭ᠃ ᠠᠪᠤ ᠬᠡᠳᠦᠨ ᠮᠠᠯ ᠢᠶᠠᠨ | ᠲᠠᠭᠤᠵᠤ ᠳᠡᠭᠦᠵᠢᠩ ᠣᠪᠣᠭᠠ ᠪᠠᠷ ᠴᠠᠭᠠᠰᠢ ᠣᠷᠣᠬᠤ ᠳᠤ ᠪᠢ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠵᠤ ᠬᠤᠶᠢᠨᠠ ᠠᠴᠠ ᠨᠢ | ᠬᠤᠷᠳᠤᠯᠠᠪᠠ᠃ ᠣᠨᠤᠭᠠ ᠲᠠᠢ ᠬᠥᠮᠥᠨ ᠶᠠᠪᠠᠭᠠᠨ ᠢᠶᠠᠷ ᠮᠠᠯ ᠲᠠᠭᠤᠭᠰᠠᠨ ᠬᠥᠮᠥᠨ ᠠᠴᠠ ᠤᠳᠠᠭᠠᠨ ᠪᠠᠶᠢᠵᠤ ᠪᠤᠯᠳᠠᠭ | ᠶᠤᠮ ᠦᠦ︖ ᠮᠢᠨᠤ ᠵᠣᠪᠠᠯᠠᠩ ᠢ ᠣᠨᠣᠭᠰᠠᠨ ᠬᠤᠯᠠ ᠮᠣᠷᠢ ᠮᠢᠨᠢ ᠮᠡᠳᠡᠵᠦ ᠪᠠᠶᠢᠭᠠ ᠮᠡᠲᠦ ᠬᠠᠱᠠᠩ᠃ ᠭᠤᠶᠠᠳᠠᠵᠤ | ᠰᠢᠪᠠᠳᠠᠭᠰᠠᠭᠠᠷ ᠬᠤᠶᠢᠨᠠ ᠠᠴᠠ ᠨᠢ ᠭᠦᠢᠴᠡᠵᠦ ᠬᠦᠷᠬᠦ ᠳᠤ ᠠᠪᠤ ᠠᠭᠤᠯᠵᠠᠷ ᠭᠠᠴᠠᠭᠠᠨ ᠤ ᠰᠠᠩ ᠤᠨ ᠭᠡᠷ ᠤᠨ | ᠡᠭᠦᠳᠡᠨ ᠲᠠᠶᠢᠰᠠᠨ ᠳᠤ ᠰᠠᠭᠤᠭᠠ ᠬᠠᠷᠠᠭᠳᠠᠯᠠ᠃ ᠬᠡᠳᠦᠨ ᠢᠮᠠᠭᠠ ᠮᠢᠨᠢ ᠴᠣ᠋ ᠵᠡᠭᠦᠨ ᠤᠷᠤᠭᠰᠢ ᠪᠠᠨ ᠬᠠᠷᠠᠨ | ᠬᠤᠰᠢᠭᠤᠷᠠᠨ ᠬᠡᠪᠲᠡᠵᠡᠢ᠃ ᠮᠢᠨᠤ ᠰᠤᠷᠤᠯᠭᠠ ᠶᠢᠨ ᠲᠥᠯᠥᠪᠦᠷᠢ ᠳᠤ ᠡᠨᠡ ᠬᠡᠳᠦᠨ ᠢᠮᠠᠭᠠ ᠶᠢ ᠰᠤᠷᠭᠠᠭᠤᠯᠢ ᠳᠤ | ᠥᠭᠭᠦᠭᠰᠡᠨ ᠶᠤᠮ᠃ ᠣᠨᠤᠭᠠ ᠪᠠᠨ ᠱᠣᠩ ᠠᠴᠠ ᠠᠷᠠᠢ ᠶᠠᠳᠠᠨ ᠤᠶᠠᠵᠤ ᠪᠠᠶᠢᠲᠠᠯᠠ ᠠᠪᠤ᠄ | ︽ᠬᠡᠦᠬᠡ ᠠ᠋︕ ᠨᠠᠭᠠᠰᠢ ᠪᠠᠨ ᠢᠷᠡ᠃ ᠠᠪᠤ ᠨᠢ ᠦᠵᠡᠶᠡ︾ ᠭᠡᠯᠡ᠃ | ᠠᠪᠤ ᠶᠡᠷᠦ ᠠᠴᠠ ᠪᠢᠳᠠᠨ ᠢ ᠬᠠᠷᠢᠶᠠᠵᠤ ᠵᠠᠩᠨᠠᠳᠠᠭ ᠦᠭᠡᠢ ᠴᠣ᠋ ᠬᠠᠶᠠ ᠨᠢᠭᠡ ᠭᠢᠯᠦᠶᠢᠵᠦ ᠬᠠᠷᠠᠬᠤ ᠪᠠᠷ ᠶᠠᠰᠤ | ᠱᠠᠷᠬᠢᠷᠠᠬᠤ ᠰᠢᠭ᠋ ᠪᠤᠯᠳᠠᠭ ᠨᠢ ᠰᠣᠨᠢᠨ᠃ ᠪᠢ ᠠᠪᠤ ᠳᠤ ᠣᠶᠢᠷᠠᠲᠤᠵᠤ ᠣᠴᠢᠭᠠᠳ ᠰᠣᠴᠢᠯᠠ᠄ ᠲᠠᠶᠢᠰᠠ ᠶᠢ | ᠲᠣᠭᠤᠷᠢᠭᠠᠳ ᠲᠠᠮᠠᠬᠢ ᠶᠢᠨ ᠶᠣᠵᠣᠭᠤᠷ ᠴᠠᠶᠢᠷᠠᠵᠠᠢ᠃ ᠠᠪᠤ ᠨᠠᠮᠠᠶᠢ ᠬᠦᠯᠢᠶᠡᠭᠡᠳ᠂ ᠠᠳᠡ ᠬᠡᠳᠦᠢ ᠤᠳᠠᠭᠰᠠᠨ ᠪᠣᠯ︖ | ᠣᠳᠤ ᠯᠠ ᠵᠠᠩᠨᠠᠬᠤ ᠪᠠᠶᠢᠬᠠ ᠭᠡᠵᠦ ᠪᠤᠳᠣᠬᠰᠠᠨ ᠮᠢᠨᠤ ᠬᠤᠶᠠᠷ ᠬᠥᠯ ᠵᠥᠷᠢᠬᠦ ᠳᠤ ᠬᠦᠴᠢᠷ ᠪᠣᠯᠪᠠ᠃ | ᠲᠣᠯᠣᠭᠠᠢ ᠪᠠᠨ ᠤᠨᠵᠢᠢᠯᠭᠠᠨ ᠬᠦᠷᠬᠦ ᠳᠤ᠄ | ︽ᠬᠡᠦᠬᠡ ᠠ᠋︕ ᠨᠠᠭᠠᠰᠢ ᠢᠷᠡ᠂ ᠠᠳᠡ ᠰᠠᠭᠤ᠃ ᠠᠪᠤ ᠨᠢ ᠦᠵᠡᠶᠡ︾ ᠭᠡᠯᠡ᠃ | ᠪᠢ ᠲᠠᠶᠢᠰᠠᠨ ᠳᠡᠭᠡᠷᠡ ᠪᠢᠰᠢ᠂ ᠠᠪᠤ ᠶᠢᠨ ᠢᠶᠠᠨ ᠡᠪᠦᠳᠦᠭ ᠢ ᠲᠦᠰᠢᠨ ᠭᠠᠵᠠᠷ ᠴᠣᠮᠴᠣᠶᠢᠨ ᠰᠠᠭᠤᠬᠤ ᠳᠤ | ᠨᠢᠯᠪᠤᠰᠤ ᠮᠠᠯ ᠭᠡᠯᠡ᠃ ᠠᠪᠤ ᠵᠠᠩᠨᠠᠬᠤ ᠦᠭᠡᠢ ᠶᠤᠮ ᠪᠠᠶᠢᠨᠠ ᠭᠡᠵᠦ ᠪᠠᠶᠠᠷᠯᠠᠬᠤ ᠤᠶᠠᠷᠠᠬᠤ ᠬᠤᠣᠰᠯᠠᠨ ᠪᠠᠶᠢᠲᠠᠯᠠ ᠠᠪᠤ | ᠮᠢᠨᠤ ᠲᠣᠯᠣᠭᠠᠢ ᠶᠢ ᠠᠶᠠᠷᠬᠠᠨ ᠢᠯᠪᠢᠭᠡᠳ᠄ | ︽ᠬᠡᠦᠬᠡ ᠠ᠋︕ ᠴᠢ ᠦᠵᠡ᠃ ᠣᠳᠤ ᠬᠤᠶᠠᠷᠬᠠᠨ ᠵᠢᠯ ᠪᠣᠯᠪᠠᠯ ᠪᠠᠭᠠ ᠰᠤᠷᠭᠠᠭᠤᠯᠢ ᠲᠡᠭᠦᠰᠴᠢᠬᠡᠨᠡ᠃ | ᠲᠠᠶᠢᠮᠦ ᠪᠢᠰᠢ ᠦᠦ︖ ᠬᠡᠳᠦᠢ ᠤᠳᠠᠬᠤ ᠳ᠋ᠠ᠃ ᠬᠤᠶᠠᠷᠬᠠᠨ ᠵᠢᠯ ᠰᠢᠣ᠂ ᠮᠢᠨᠤ ᠬᠦᠦ︾ ᠭᠡᠳ ᠮᠢᠨᠤ ᠤᠷᠳᠤᠭᠤᠷ | ᠬᠤᠶᠠᠷ ᠬᠤᠷᠤᠭᠤ ᠪᠠᠨ ᠬᠥᠳᠡᠯᠭᠡᠯᠡ᠃ ᠨᠢᠯᠪᠤᠰᠤᠨ ᠳᠤ ᠪᠦᠷᠬᠦᠭᠰᠡᠨ ᠨᠢᠳᠦ ᠪᠠᠷ ᠬᠠᠷᠠᠬᠤ ᠳᠤ ᠨᠢᠭᠡ ᠨᠢ ᠬᠤᠮᠣᠭᠤᠷ | ᠬᠤᠷᠤᠭᠤ᠂ ᠨᠦᠭᠦᠭᠡ ᠨᠢ ᠳᠤᠮᠳᠠ ᠬᠤᠷᠤᠭᠤ᠃ ᠠᠪᠤ ᠶᠢᠨ ᠣᠷᠳᠤ᠂ ᠪᠦᠳᠦᠭᠦᠨ ᠬᠤᠶᠠᠷ ᠬᠤᠷᠤᠭᠤ ᠬᠤᠯᠠ | ᠮᠣᠷᠢᠨ ᠤ ᠮᠢᠨᠢ ᠬᠤᠶᠠᠷ ᠴᠢᠬᠢ ᠰᠢᠭ ᠬᠠᠶᠢᠴᠢᠯᠠᠵᠤ ᠬᠠᠷᠠᠭᠳᠠᠨᠠ᠃ | ᠰᠡᠳᠬᠢᠯ ᠣᠩᠭᠤᠶᠢᠭᠠᠳ ᠶᠠᠪᠤᠴᠢᠬᠠᠪᠠ᠄ ᠦᠨᠡᠬᠡᠷ ᠳ᠋ᠠ᠂ ᠬᠤᠶᠠᠷᠬᠠᠨ ᠵᠢᠯ᠃ ᠪᠢ ᠶᠠᠭᠠᠬᠢᠭᠠᠳ ᠡᠭᠦᠨ ᠢ | ᠪᠤᠳᠣᠵᠣ ᠣᠯᠣᠭᠰᠠᠨ ᠦᠭᠡᠢ ᠶᠤᠮ︖ ᠨᠢᠭᠡ᠂ ᠬᠤᠶᠠᠷ᠂ ᠡᠨᠡ ᠴᠢᠨᠢ ᠢᠷᠡᠴᠢᠬᠡᠭᠰᠡᠨ ᠪᠢᠰᠢ ᠶᠤᠮ ᠦᠦ︖ | ᠪᠤᠳᠣᠯ ᠶᠠᠭᠠᠷᠠᠬᠤ ᠰᠢᠭ᠋ ᠪᠣᠯᠪᠠ᠃ ᠬᠤᠷᠳᠤᠨ ᠶᠠᠪᠤᠶᠠ᠂ ᠡᠨᠡ ᠬᠤᠶᠠᠷ ᠵᠢᠯ ᠢᠶᠠᠨ ᠬᠤᠷᠳᠤᠨ ᠪᠠᠷᠠᠭᠠᠶᠠ᠃ ᠲᠡᠭᠡᠪᠡᠯ | ᠪᠢ ᠪᠠᠭᠠ ᠰᠤᠷᠭᠠᠭᠤᠯᠢ ᠪᠠᠨ ᠲᠡᠭᠦᠰᠬᠡᠴᠢᠬᠡᠬᠦ ᠪᠢᠰᠢ ᠶᠤᠮ ᠦᠦ︖ ᠭᠡᠵᠦ ᠤᠷᠮᠠᠰᠢᠭᠰᠠᠨ ᠪᠢ᠄ | ︽ᠠᠪᠤ ᠠ᠋︕ ᠣᠳᠤ ᠶᠠᠪᠤᠴᠢᠬᠠᠶᠠ︾ ᠭᠡᠪᠡ᠃ | ︽ᠵᠠ ᠲᠡᠭᠡᠶᠡ︕︾ | ᠠᠳᠡ ᠤᠳᠠᠭᠠᠨ ᠰᠠᠭᠤᠬᠤ ᠪᠠᠷ ᠰᠤᠷᠭᠠᠭᠤᠯᠢ ᠳᠤ ᠥᠩᠭᠡᠷᠡᠭᠦᠯᠬᠦ ᠴᠠᠭ ᠢᠶᠠᠨ ᠬᠤᠷᠳᠤᠨ ᠳᠥᠬᠦᠭᠦᠯᠦᠶᠡ ᠭᠡᠵᠦ | ᠪᠤᠳᠣᠬᠰᠠᠨ ᠶᠤᠮ᠃ ᠢᠩᠭᠢᠵᠦ ᠪᠤᠳᠤᠭᠠᠳ ᠢᠷᠡᠬᠦ ᠳᠤ ᠪᠢ ᠡᠷᠴᠢ ᠲᠠᠢ ᠴᠣ᠋᠂ ᠬᠦᠴᠦ ᠲᠠᠢ ᠴᠣ᠋ ᠪᠣᠯᠣᠯᠠ᠃ | ᠰᠡᠳᠬᠢᠯ ᠤᠨ ᠲᠠᠮᠢᠷ ᠭᠡᠵᠦ ᠡᠶᠢᠮᠦ ᠯᠡ ᠴᠢᠩᠭᠠ ᠪᠠᠶᠢᠳᠠᠭ ᠢ ᠪᠢ ᠠᠭᠤᠯᠵᠠᠷ ᠭᠠᠴᠠᠭᠠᠨ ᠤ ᠰᠠᠩ ᠤᠨ ᠭᠡᠷ ᠤᠨ | ᠱᠦᠢᠨᠢ ᠲᠠᠶᠢᠰᠠᠨ ᠳᠤ ᠰᠠᠭᠤᠭᠠ ᠠᠪᠤ ᠶᠢᠨ ᠢᠶᠠᠨ ᠶᠠᠷᠢᠭᠰᠠᠨ ᠦᠭᠡ ᠠᠴᠠ ᠮᠡᠳᠡᠭᠰᠡᠨ ᠶᠤᠮ᠃ ᠠᠪᠤ ᠪᠢᠳᠠ ᠬᠤᠶᠠᠷ | ᠮᠠᠯ ᠢᠶᠠᠨ ᠲᠠᠭᠤᠵᠤ ᠰᠤᠷᠭᠠᠭᠤᠯᠢ ᠶᠢ ᠴᠢᠭᠯᠡᠨ ᠬᠥᠳᠡᠯᠦᠯᠡ᠃ ᠪᠢ ᠴᠣ᠋ ᠭᠡᠰᠡᠨ ᠨᠢᠯᠪᠤᠰᠤ ᠪᠠᠨ ᠭᠤᠭᠤᠵᠢᠭᠤᠯᠤᠭᠰᠠᠨ | ᠬᠡᠦᠬᠡᠳ ᠪᠢᠰᠢ᠂ ᠠᠪᠤ ᠶᠢᠨ ᠠᠯᠢᠶᠠ ᠦᠷᠡ ᠪᠣᠯᠵᠤ᠂ ᠮᠠᠯ ᠢᠶᠠᠨ ᠴᠤᠭ ᠲᠠᠭᠤᠨᠠ᠃ ᠠᠪᠤ ᠪᠠᠶᠢᠨ ᠪᠠᠶᠢᠨ ᠢᠰᠭᠢᠷᠴᠣ | ᠂ ᠬᠠᠶᠠ ᠬᠠᠶᠠ ᠳᠠᠭᠤᠤ ᠭᠢᠩᠰᠢᠨᠡ᠃ ᠠᠪᠤ ᠶᠢᠨ ᠳᠠᠭᠤᠯᠠᠬᠤ ᠶᠢ ᠪᠢ ᠰᠠᠶ᠋ᠢ ᠰᠣᠨᠣᠰᠪᠠ᠃ ᠠᠪᠤ ᠪᠠᠰᠠ ᠳᠠᠭᠤᠯᠠᠳᠠᠭ | ᠪᠠᠶᠢᠭᠰᠠᠨ ᠪᠠᠶᠢᠵᠠᠢ᠃ | ᠪᠢ ᠠᠭᠤᠯᠵᠠᠷ ᠭᠠᠴᠠᠭᠠ ᠪᠠᠷ ᠢᠷᠡᠬᠦ ᠪᠦᠷᠢ ᠠᠪᠤ ᠶᠢᠨ ᠢᠶᠠᠨ ᠰᠠᠭᠤᠵᠤ ᠪᠠᠶᠢᠭᠰᠠᠨ ᠰᠠᠩ ᠤᠨ ᠭᠡᠷ ᠤᠨ | ᠡᠭᠦᠳᠡᠨ ᠤ ᠱᠦᠢᠨᠢ ᠲᠠᠶᠢᠰᠠ ᠳᠡᠭᠡᠷᠡ ᠤᠳᠠᠲᠠᠯᠠ ᠰᠠᠭᠤᠳᠠᠭ᠃ ᠡᠨᠡ ᠲᠠᠶᠢᠰᠠᠨ ᠳᠡᠭᠡᠷᠡ ᠰᠠᠭᠤᠭᠠᠳ ᠬᠡᠳᠦᠨ | ᠢᠮᠠᠭᠠ ᠲᠠᠢ ᠪᠠᠨ ᠴᠤᠭ᠂ ᠨᠢᠯᠪᠤᠰᠤᠲᠠᠢ ᠨᠢᠳᠦ ᠪᠠᠷ ᠭᠡᠷ ᠤᠨ ᠢᠶᠠᠨ ᠪᠠᠶᠢᠭᠠ ᠵᠦᠭ ᠲᠤ ᠤᠶᠠᠷᠠᠨ ᠬᠠᠷᠠᠵᠤ ᠰᠠᠭᠤᠭᠠ | ᠠᠷᠭᠠᠴᠠᠭᠠ ᠦᠭᠡᠢ ᠬᠥᠭᠡᠷᠦᠬᠦᠢ ᠳᠦᠷᠢ ᠪᠠᠨ ᠪᠤᠳᠣᠵᠣ ᠣᠯᠬᠤ ᠪᠦᠷᠢ᠄ | ︽ᠬᠡᠦᠬᠡ ᠠ᠋︕ ᠴᠢ ᠦᠵᠡ᠃ ᠣᠳᠤ ᠬᠤᠶᠠᠷᠬᠠᠨ ᠵᠢᠯ ᠪᠣᠯᠪᠠᠯ ᠪᠠᠭᠠ ᠰᠤᠷᠭᠠᠭᠤᠯᠢ ᠪᠠᠨ | ᠲᠡᠭᠦᠰᠬᠡᠴᠢᠬᠡᠨᠡ᠃ ᠲᠠᠶᠢᠮᠦ ᠪᠢᠰᠢ ᠦᠦ︖ ᠬᠡᠳᠦᠢ ᠤᠳᠠᠬᠤ ᠳ᠋ᠠ᠃ ᠬᠤᠶᠠᠷᠬᠠᠨ ᠵᠢᠯ ᠰᠢᠣ᠂ ᠮᠢᠨᠤ ᠬᠦᠦ︾ ᠬᠡᠮᠡᠨ | ᠠᠶᠠᠷᠬᠠᠨ ᠥᠭᠦᠯᠡᠬᠦ ᠠᠪᠤ ᠶᠢᠨ ᠮᠢᠨᠢ ᠬᠡᠯᠡᠭᠰᠡᠨ ᠦᠭᠡ ᠰᠣᠨᠣᠰᠳᠠᠨᠠ᠃ ᠠᠳᠡ ᠠᠴᠠ ᠪᠢ ᠬᠦᠴᠦ ᠠᠪᠴᠤ᠂ | ᠢᠷᠡᠭᠡᠳᠦᠢ ᠵᠦᠭ ᠢᠶᠠᠨ ᠪᠠᠷᠳᠠᠮ ᠠᠯᠬᠤᠭᠰᠠᠨ ᠲᠡᠦᠬᠡ ᠲᠠᠢ ᠰᠠᠨ᠃ | ᠰᠡᠳᠬᠢᠯ ᠮᠢᠨᠢ ᠬᠠᠮᠤᠭ ᠤᠨ ᠬᠡᠪᠡᠷᠡᠭ᠂ ᠬᠠᠮᠤᠭ ᠤᠨ ᠡᠮᠵᠡᠭ ᠪᠠᠶᠢᠭᠰᠠᠨ ᠴᠠᠭ ᠲᠤ ᠬᠠᠮᠤᠭ ᠤᠨ ᠵᠥᠭᠡᠯᠡᠨ | ᠦᠭᠡ ᠪᠠᠷ ᠬᠦᠦ ᠪᠠᠨ ᠤᠷᠮᠠᠰᠢᠭᠤᠯᠤᠭᠰᠠᠨ ᠠᠪᠤ ᠮᠢᠨᠢ ᠁ |