| ᠬᠠᠮᠲᠤ ᠶᠢᠨ ᠮᠠᠯ ᠮᠠᠯᠵᠢᠵᠤ ᠪᠠᠶᠢᠭᠰᠠᠨ ᠦᠶᠡ ᠳᠤ ᠮᠠᠨ ᠤ ᠬᠠᠷᠢᠭᠤᠯᠳᠠᠭ ᠰᠦᠷᠦᠭ ᠲᠤ ᠴᠢᠨᠳᠠᠭᠠ ᠨᠡᠷᠡ | ᠲᠠᠢ ᠴᠠᠭᠠᠨ ᠢᠩᠭᠡᠨ ᠠᠴᠠ ᠴᠠᠪ ᠴᠠᠭᠠᠨ ᠪᠣᠲᠣᠭᠤ ᠭᠠᠷᠪᠠ᠃ ᠭᠤᠪᠢ ᠶᠢᠨ ᠬᠢᠨ ᠬᠦᠷᠡᠩ᠂ ᠤᠯᠠᠭᠠᠨ᠂ ᠰᠢᠷᠠ | ᠵᠢᠰᠦᠮ ᠤᠨ ᠲᠡᠮᠡᠭᠡ ᠭᠤᠣᠯᠲᠠᠢ ᠮᠠᠯᠵᠢᠵᠤ᠂ ᠴᠠᠭᠠᠨ ᠲᠡᠮᠡᠭᠡ ᠶᠢ ᠰᠣᠨᠢᠭᠤᠴᠢᠯᠠᠨ ᠪᠠᠭ᠋ᠠᠷᠬᠠᠳᠠᠭ᠃ | ᠨᠢᠭᠡ ᠡᠳᠦᠷ ᠪᠢ ᠪᠣᠲᠣᠭᠤ ᠲᠠᠢ ᠢᠩᠭᠡ ᠪᠠᠨ ᠬᠤᠷᠢᠶᠠᠨ ᠬᠤᠲᠠᠯᠠᠭᠤᠯᠵᠤ ᠶᠠᠪᠤᠲᠠᠯᠠ ᠴᠢᠨᠳᠠᠭᠠ | ᠪᠣᠲᠣᠭᠤ ᠲᠠᠢ ᠪᠠᠨ ᠬᠤᠶᠠᠭᠤᠯᠠ ᠪᠠᠶᠢᠨ ᠪᠠᠶᠢᠨ ᠪᠤᠶᠢᠯᠠᠭᠠᠳ ᠪᠠᠶᠢᠯᠠ᠃ ︽ᠶᠠᠮᠠᠷᠪᠠ ᠠᠮᠢᠳᠠᠨ ᠳᠤ ᠥᠪᠡᠷ ᠥᠪᠡᠷ ᠤᠨ | ᠬᠢᠨᠢ ᠦᠭᠡ ᠭᠡᠯᠡ ᠪᠠᠶᠢᠳᠠᠭ᠃ ᠶᠢᠰᠦᠨ ᠭᠡᠯᠡ ᠮᠡᠳᠡᠳᠡᠭ ᠬᠥᠮᠥᠨ ᠰᠠᠶ᠋ᠢ ᠠᠯᠢᠪᠠ ᠠᠮᠢᠲᠠᠳ ᠤᠨ ᠦᠭᠡ ᠭᠡᠯᠡ ᠶᠢ | ᠣᠶᠢᠯᠠᠭᠠᠳᠠᠭ ᠭᠡᠨᠡ︾ ᠭᠡᠵᠦ ᠨᠠᠰᠤᠲᠠᠶᠢᠴᠤᠳ ᠤᠨ ᠬᠠᠭᠤᠴᠢᠯᠠᠬᠤ ᠶᠢ ᠪᠢᠰᠢᠭᠦᠢ ᠠᠷᠪᠢᠨ ᠰᠣᠨᠣᠰᠤᠭᠰᠠᠨ ᠪᠢ | ︽ᠶᠢᠰᠦᠨ ᠭᠡᠯᠡ ᠮᠡᠳᠡᠳᠡᠭ ᠴᠤ ᠪᠣᠯᠣᠭᠠᠰᠠᠢ᠂ ᠡᠨᠡ ᠡᠬᠡ ᠬᠦᠦ ᠬᠤᠶᠠᠷ ᠤᠨ ᠶᠠᠭᠤ ᠶᠠᠷᠢᠵᠤ ᠶᠠᠪᠤᠭᠠ ᠶᠢ ᠮᠡᠳᠡᠬᠦ ᠶᠤᠮ | ᠰᠠᠨ︕︾ ᠭᠡᠵᠦ ᠪᠤᠳᠤᠪᠠ᠃ ᠦᠨᠡᠰᠦᠨ ᠳᠡᠭᠡᠷᠡ ᠣᠴᠢᠭᠠᠳ ᠨᠠᠯᠠᠬᠤ ᠳᠠᠭᠠᠨ ᠭᠦᠷᠲᠡᠯᠡ ᠪᠤᠶᠢᠯᠠᠬᠤ ᠪᠠᠷ ᠨᠢ ᠪᠢ | ᠶᠡᠬᠡᠳᠡ ᠭᠠᠶᠢᠬᠠᠵᠤ᠄ ︽ᠡᠵᠢ ᠠ᠋᠂ ᠴᠢᠨᠳᠠᠭᠠ ᠪᠣᠲᠣᠭᠤ ᠲᠠᠢ ᠪᠠᠨ ᠪᠠᠶᠢᠨ ᠪᠠᠶᠢᠨ ᠪᠤᠶᠢᠯᠠᠭᠠᠳ ᠪᠠᠶᠢᠨᠠ︾ ᠭᠡᠰᠡᠨ ᠳᠤ᠂ | ︽ᠠᠲᠠᠨ ᠲᠡᠮᠡᠭᠡ ᠪᠤᠶᠢᠯᠠᠬᠤ ᠮᠠᠭᠤ ᠭᠡᠳᠡᠭ᠃ ᠪᠣᠲᠣᠭᠤ ᠲᠠᠢ ᠢᠩᠭᠡ ᠪᠤᠶᠢᠯᠠᠬᠤ ᠴᠤ ᠶᠠᠭᠠᠬᠢᠬᠤ ᠪᠤᠢ︕︾ ᠭᠡᠳ ᠡᠵᠢ | ᠡᠰᠡ ᠲᠣᠭᠤᠪᠠ᠃ | ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠪᠣᠲᠣᠭᠤ ᠲᠠᠢ ᠢᠩᠭᠡ ᠪᠠᠨ ᠤᠰᠤᠯᠠᠬᠤ ᠪᠠᠷ ᠲᠠᠭᠤᠵᠤ ᠶᠠᠪᠤᠲᠠᠯᠠ ᠴᠢᠨᠳᠠᠭᠠ ᠪᠠᠰᠠ | ᠯᠠ ᠪᠣᠲᠣᠭᠤ ᠲᠠᠢ ᠪᠠᠨ ᠬᠤᠶᠠᠭᠤᠯᠠ ᠪᠠᠶᠢᠨ ᠰᠠᠭᠤᠨ ᠪᠤᠶᠢᠯᠠᠯᠴᠠᠨᠠ᠃ ᠡᠭᠦᠨ ᠢ ᠬᠠᠷᠠᠭᠰᠠᠨ ᠪᠢ ︽ᠴᠢᠨᠳᠠᠭᠠ ᠯᠠᠪ | ᠬᠦᠦ ᠳᠡᠭᠡᠨ ︿ᠮᠠᠨ ᠤ ᠳᠡᠭᠡᠳᠦᠭᠦᠯᠡ ᠠᠷᠪᠠᠨ ᠰᠠᠯᠠᠭᠠ ᠡᠪᠡᠷ ᠲᠠᠢ ᠠᠶᠢᠬᠤᠪᠲᠤᠷ ᠰᠦᠷᠯᠢᠭ ᠠᠮᠢᠳᠠᠨ ᠪᠠᠶᠢᠭᠰᠠᠨ ᠶᠤᠮ | ᠭᠡᠨᠡ᠃ ᠨᠢᠭᠡ ᠡᠳᠦᠷ ᠤᠢ ᠶᠢᠨ ᠪᠤᠭᠤ ᠡᠪᠡᠷ ᠢ ᠨᠢ ᠵᠢᠭᠡᠯᠡᠵᠦ ᠠᠪᠤᠭᠠᠳ ᠶᠠᠪᠤᠬᠤ ᠳᠠᠭᠠᠨ ᠬᠤᠳᠳᠤᠭ ᠳᠡᠭᠡᠷᠡ | ᠤᠰᠤ ᠤᠤᠭᠤᠬᠤ ᠳᠤ ᠴᠢᠨᠢ ᠠᠪᠴᠢᠷᠠᠵᠤ ᠥᠭᠭᠦᠶᠡ ᠭᠡᠵᠦ ᠠᠨᠳᠠᠭᠠᠶᠢᠯᠠᠭᠰᠠᠨ ᠶᠤᠮ︕ ᠭᠡᠳᠡᠭ᠃ ᠬᠦᠦ ᠮᠢᠨᠢ | ᠤᠰᠤ ᠤᠤᠭᠤᠬᠤ ᠳᠠᠭᠠᠨ ᠲᠠᠶᠢᠪᠤᠩ ᠤᠤᠭᠤᠵᠤ᠂ ᠡᠶᠢᠰᠢ ᠲᠡᠶᠢᠰᠢ ᠰᠠᠶᠢᠨ ᠪᠠᠷᠠᠯᠠᠵᠤ ᠪᠠᠢ︕ ᠬᠠᠮᠢᠭᠠ | ᠨᠢᠭᠡᠲᠡᠢ ᠠᠴᠠ ᠤᠢ ᠶᠢᠨ ᠪᠤᠭᠤ ᠠᠷᠪᠠᠨ ᠰᠠᠯᠠᠭᠠ ᠡᠪᠡᠷ ᠢ ᠮᠢᠨᠢ ᠬᠦᠷᠭᠡᠵᠦ ᠢᠷᠡᠬᠦ ᠶᠠᠭᠤ ᠮᠠᠭᠠᠳ︕﹀ ᠬᠡᠮᠡᠨ | ᠵᠠᠬᠢᠵᠤ ᠪᠠᠶᠢᠬᠤ ᠪᠠᠨ ᠶᠠᠳᠠᠬᠤ ᠦᠭᠡᠢ︾ ᠭᠡᠵᠦ ᠪᠤᠳᠤᠨ ᠢᠨᠢᠶᠡᠳᠦ ᠭᠦᠷᠪᠡ᠃ | ᠦᠳᠡ ᠶᠢᠨ ᠬᠤᠶᠢᠨᠠ ᠮᠠᠨ ᠤ ᠪᠠᠷᠢᠭᠠᠳᠠ ᠶᠢᠨ ᠳᠠᠷᠤᠭᠠ᠂ ᠦᠯᠦ ᠲᠠᠨᠢᠬᠤ ᠬᠤᠶᠠᠷ ᠬᠥᠮᠥᠨ ᠲᠠᠢ ᠬᠠᠮᠲᠤ | ᠢᠷᠡᠭᠡᠳ᠄ ︽ᠲᠠᠨ ᠤ ᠴᠠᠭᠠᠨ ᠢᠩᠭᠡ ᠶᠢ ᠪᠣᠲᠣᠭᠤ ᠲᠠᠢ ᠨᠢ ᠬᠠᠮᠲᠤ ᠵᠢᠭᠤᠯᠴᠢᠯᠠᠯ ᠤᠨ ᠭᠠᠵᠠᠷ ᠠᠪᠠᠴᠢᠬᠤ ᠪᠠᠷ | ᠪᠣᠯᠤᠭᠰᠠᠨ︕︾ ᠭᠡᠪᠡ᠃ ︽ᠪᠢ ᠴᠢᠨᠳᠠᠭᠠ ᠪᠠᠨ ᠥᠭᠬᠦ ᠦᠭᠡᠢ︕︾ ᠭᠡᠵᠦ ᠣᠬᠢᠯᠠᠭᠰᠠᠨ ᠳᠤ᠂ ᠪᠠᠷᠢᠭᠠᠳᠠ ᠶᠢᠨ | ᠳᠠᠷᠤᠭᠠ᠄ ︽ᠴᠢᠨᠳᠠᠭᠠ ᠶᠢ ᠴᠢᠨᠢ ᠶᠡᠭᠡ ᠬᠤᠲᠠ ᠶᠢᠨ ᠵᠢᠭᠤᠯᠴᠢᠯᠠᠯ ᠤᠨ ᠭᠠᠵᠠᠷ ᠠᠪᠠᠴᠢᠨᠠ᠃ ᠤᠯᠠᠨ ᠬᠥᠮᠥᠨ | ᠴᠢᠨᠳᠠᠭᠠ ᠶᠢ ᠴᠢᠨᠢ ᠬᠤᠯᠢᠴᠠ ᠦᠭᠡᠢ ᠴᠠᠭᠠᠨ ᠵᠢᠰᠦᠮ ᠲᠠᠢ ᠬᠤᠪᠣᠷ ᠵᠢᠰᠦᠮ ᠤᠨ ᠢᠩᠭᠡ ᠪᠠᠶᠢᠨᠠ ᠭᠡᠵᠦ ᠮᠠᠭᠲᠠᠨᠠ᠃ | ᠪᠣᠲᠣᠭᠤ ᠶᠢᠨ ᠬᠢᠨᠢ ᠬᠥᠭᠡᠷᠦᠬᠦᠨ ᠭᠡᠴᠢ︕ ᠬᠡᠮᠡᠨ ᠱᠠᠭᠰᠢᠨᠠ︾ ᠭᠡᠯᠡ᠃ ᠡᠵᠢ ᠬᠠᠵᠠᠭᠤ ᠠᠴᠠ ︽ᠬᠠᠮᠲᠤ ᠶᠢᠨ | ᠮᠠᠯ ᠢ ᠬᠠᠮᠢᠭᠠᠰᠢ ᠨᠢ ᠠᠪᠠᠴᠢᠨᠠ ᠭᠡᠪᠡᠯ ᠲᠡᠶᠢᠰᠢ ᠨᠢ ᠥᠭᠬᠦ ᠬᠡᠷᠡᠭᠲᠡᠢ᠃ ᠥᠭᠬᠦ ᠦᠭᠡᠢ ᠪᠠᠶᠢᠵᠤ ᠪᠤᠯᠳᠠᠭ ᠦᠭᠡᠢ | ᠶᠤᠮ︾ ᠭᠡᠵᠦ ᠠᠷᠭᠠᠳᠠᠪᠠ᠃ | ᠦᠯᠦ ᠲᠠᠨᠢᠬᠤ ᠬᠤᠶᠠᠷ ᠬᠥᠮᠥᠨ ᠴᠢᠨᠳᠠᠭᠠ ᠶᠢ ᠬᠥᠲᠥᠯᠥᠨ ᠪᠣᠲᠣᠭᠤ ᠶᠢ ᠨᠢ ᠳᠠᠭᠠᠭᠤᠯᠤᠭᠰᠠᠭᠠᠷ ᠤᠷᠳᠤ | ᠨᠢᠷᠤᠭᠤᠨ ᠳᠡᠭᠡᠭᠦᠷ ᠳᠠᠪᠠᠯᠠ᠃ ᠡᠬᠡ ᠪᠣᠲᠣᠭᠤ ᠬᠤᠶᠠᠷ ᠤᠨ ᠪᠤᠶᠢᠯᠠᠬᠤ ᠲᠠᠭᠤᠨ ᠬᠤᠯᠠᠳᠠᠨ ᠬᠤᠯᠠᠳᠠᠭᠰᠠᠭᠠᠷ ᠴᠢᠮᠡᠭᠡ | ᠲᠠᠰᠤᠷᠠᠪᠠ᠃ ᠮᠢᠨᠤ ᠨᠢᠯᠪᠤᠰᠤ ᠴᠢᠪ ᠴᠢᠮᠡᠭᠡ ᠦᠭᠡᠢ ᠲᠤᠰᠤᠯᠠᠨᠠ᠃ ᠰᠦᠷᠦᠭ ᠳᠣᠲᠣᠷᠠ ᠪᠠᠨ ᠰᠣᠳᠣᠨ | ᠵᠢᠰᠦᠮ ᠲᠠᠢ ᠡᠬᠡ ᠪᠣᠲᠣᠭᠤ ᠬᠤᠶᠠᠷ ᠪᠠᠶᠢᠨ ᠲᠠᠭᠢᠨ ᠪᠤᠶᠢᠯᠠᠵᠤ ᠪᠠᠶᠢᠭᠰᠠᠨ ᠨᠢ ᠦᠶᠡ ᠦᠶᠡ ᠪᠤᠳᠤᠬᠳᠠᠨ | ᠦᠭᠡᠶᠢᠯᠡᠭᠳᠡᠨᠡ᠃ ᠴᠢᠨᠳᠠᠭᠠ ᠡᠬᠡ ᠪᠣᠲᠣᠭᠤ ᠬᠤᠶᠠᠷ ᠢ ᠠᠮᠢᠳᠠᠨ ᠤ ᠬᠦᠷᠢᠶᠡᠯᠡᠩ ᠳᠤ ᠣᠴᠢᠭᠠᠳ ᠪᠡᠯᠡᠨ ᠵᠡᠯᠡᠨ ᠢ | ᠢᠳᠡᠨ ᠲᠠᠶᠢᠪᠤᠩ ᠠᠮᠤᠭᠤᠯᠠᠩ ᠬᠡᠪᠢᠨ ᠵᠤᠬᠰᠤᠬᠤ ᠳᠤ᠂ ᠲᠣᠭᠤᠷᠢᠨ ᠵᠢᠭᠤᠯᠴᠢᠯᠠᠬᠰᠠᠳ ᠠᠯᠠᠭᠠ ᠲᠠᠰᠢᠨ ᠱᠠᠭᠰᠢᠨ | ᠮᠠᠭᠲᠠᠵᠤ ᠪᠠᠶᠢᠬᠤ ᠪᠠᠷ ᠲᠥᠰᠥᠭᠡᠯᠡᠨᠡ᠃ ᠪᠠᠰᠠ ᠵᠠᠷᠢᠮ ᠳᠠᠭᠠᠨ ᠥᠪᠡᠷ ᠢ ᠪᠠᠨ ᠳᠤᠭᠤᠷᠠᠭᠯᠠᠭᠰᠠᠨ ᠤᠯᠠᠨ ᠤ ᠡᠮᠦᠨᠡ | ᠵᠣᠭᠰᠣᠴᠢᠬᠠᠭᠰᠠᠨ᠄ ︽ᠡᠨᠡ ᠪᠣᠯ ᠮᠠᠨ ᠤ ᠬᠤᠲᠠᠨ ᠤ ᠢᠩᠭᠡ᠂ ᠴᠢᠨᠳᠠᠭᠠ ᠭᠡᠳᠡᠭ᠃ ᠪᠣᠲᠣᠭᠤ ᠶᠢ ᠨᠢ ᠪᠢ | ᠠᠮᠠᠳᠠᠭᠤᠯᠤᠭᠰᠠᠨ ᠶᠤᠮ︾ ᠭᠡᠳ ᠡᠪᠴᠢᠭᠦᠦ ᠪᠠᠨ ᠳᠡᠯᠡᠳᠦᠨ ᠬᠥᠭᠰᠡᠵᠦ ᠪᠠᠶᠢᠬᠤ ᠪᠠᠷ ᠵᠡᠭᠦᠳᠦᠯᠡᠵᠦ ᠴᠤ ᠭᠠᠷᠤᠭᠰᠠᠨ᠃ | ᠡᠳᠦᠷ ᠤᠨ ᠪᠤᠳᠤᠯ ᠰᠥᠨᠢ ᠶᠢᠨ ᠵᠡᠭᠦᠳᠦ ᠭᠡᠵᠦ ᠡᠭᠦᠨ ᠢ ᠬᠡᠯᠡᠳᠡᠭ ᠪᠠᠶᠢᠬᠤ᠃ | ᠨᠠᠮᠤᠷ ᠨᠢ ᠪᠢ ᠰᠤᠷᠭᠠᠭᠤᠯᠢ ᠳᠤ ᠣᠷᠣᠵᠤ ᠰᠣᠶᠣᠯ ᠤᠨ ᠮᠥᠷ ᠬᠥᠭᠡᠭᠡᠯᠡ᠃ ᠠᠩᠭᠢ ᠲᠠᠪᠰᠢᠬᠤ ᠶᠢ | ᠳᠠᠭᠠᠯᠳᠤᠨ ᠪᠢᠴᠢᠭ ᠡᠷᠳᠡᠮ ᠰᠤᠷᠴᠤ ᠬᠤᠯᠠ ᠭᠠᠵᠠᠷ ᠶᠠᠪᠤᠨ ᠶᠡᠭᠡ ᠶᠢ ᠦᠵᠡᠬᠦ ᠪᠠᠷ ᠮᠥᠷᠥᠭᠡᠳᠳᠡᠭ ᠴᠤ ᠪᠣᠯᠪᠠ᠃ | ᠠᠩᠬᠠ ᠲᠤᠮᠳᠠᠳᠤ ᠳᠤ ᠣᠷᠣᠭᠠᠳ ᠰᠢᠷᠡᠭᠡᠨ ᠨᠠᠶᠢᠵᠢ ᠳᠠᠭᠠᠨ ᠴᠢᠨᠳᠠᠭᠠ ᠶᠢᠨ ᠲᠤᠬᠠᠢ ᠶᠠᠷᠢᠭᠰᠠᠨ ᠳᠤ᠂ ︽ᠴᠢᠨᠳᠠᠭᠠ | ᠴᠢᠨᠢ ᠣᠳᠤ ᠪᠣᠲᠣᠭᠤ ᠲᠠᠢ ᠪᠠᠨ ᠭᠦᠭᠡᠬᠤᠳᠠ ᠶᠢᠨ ᠠᠮᠢᠳᠠᠨ ᠤ ᠬᠦᠷᠢᠶᠡᠯᠡᠩ ᠳᠤ ᠵᠢᠭᠤᠯᠴᠢᠯᠠᠬᠰᠠᠳ ᠤᠨ ᠨᠢᠳᠦ ᠶᠢ | ᠬᠤᠵᠢᠷᠯᠠᠵᠤ ᠪᠠᠶᠢᠭᠠ ᠪᠠᠶᠢᠯᠭᠦᠢ︕︾ ᠭᠡᠯᠡ᠃ ᠣᠷᠣᠢ ᠨᠢ ᠪᠢ ᠴᠢᠨᠳᠠᠭᠠ ᠶᠢ ᠠᠮᠢᠳᠠᠨ ᠤ ᠬᠦᠷᠢᠶᠡᠯᠡᠩ ᠳᠤ | ᠪᠣᠲᠣᠭᠤ ᠪᠠᠨ ᠬᠥᠬᠦᠭᠦᠯᠦᠭᠡᠳ ᠵᠣᠭᠰᠣᠵᠤ ᠪᠠᠶᠢᠬᠤ ᠪᠠᠷ ᠵᠡᠭᠦᠳᠦᠯᠡᠪᠡ᠃ ᠪᠣᠲᠣᠭᠤ ᠨᠢ ᠶᠠᠭᠠᠬᠢᠯᠠ ᠭᠡᠵᠦ ᠬᠡᠵᠢᠶᠡᠳᠡ | ᠪᠣᠲᠣᠭᠤ ᠪᠠᠷ ᠢᠶᠠᠨ ᠪᠠᠶᠢᠭᠠᠳ ᠪᠠᠶᠢᠬᠤ ᠪᠤᠢ᠃ ᠲᠤᠷᠤᠭ ᠪᠡᠶᠡ ᠲᠠᠢ ᠠᠳᠠ ᠪᠣᠯᠴᠢᠬᠠᠭᠠᠳ ᠵᠢᠭᠤᠯᠴᠢᠯᠠᠬᠰᠠᠳ ᠤᠨ | ᠪᠠᠭ᠋ᠠᠷᠬᠠᠯ ᠢ ᠤᠯᠠᠮ ᠢᠯᠡᠭᠦᠦ ᠲᠠᠲᠠᠵᠤ ᠪᠠᠶᠢᠭᠠ ᠪᠠᠶᠢᠯᠭᠦᠢ︕ ᠴᠠᠭᠠᠨ ᠢᠩᠭᠡ ᠲᠠᠭᠢᠵᠤ ᠪᠣᠲᠣᠭᠤᠯᠠᠭᠰᠠᠨ ᠪᠣᠯ ᠤᠤ︖ | ᠁ ᠬᠡᠮᠡᠨ ᠵᠦᠢᠯ ᠵᠦᠢᠯ ᠢᠶᠠᠷ ᠲᠥᠰᠥᠭᠡᠯᠡᠪᠡ᠃ | ᠡᠨᠡ ᠵᠡᠭᠦᠳᠦ ᠨᠠᠳᠠ ᠭᠦᠭᠡᠬᠤᠲᠠ ᠶᠢᠨ ᠶᠠᠮᠠᠷ ᠨᠢᠭᠡᠨ ᠰᠤᠷᠭᠠᠭᠤᠯᠢ ᠳᠤ ᠰᠢᠯᠭᠠᠨ ᠣᠷᠣᠵᠤ ᠡᠬᠡ ᠪᠣᠲᠣᠭᠤ | ᠬᠤᠶᠠᠷ ᠢ ᠡᠷᠭᠢᠵᠦ ᠦᠵᠡᠬᠦ ᠬᠦᠰᠡᠯ ᠤᠷᠭᠤᠭᠤᠯᠵᠦ᠂ ᠬᠢᠴᠢᠶᠡᠯ ᠰᠤᠷᠤᠯᠭᠠ ᠳᠠᠭᠠᠨ ᠴᠢᠷᠮᠠᠶᠢᠳᠠᠭ ᠪᠣᠯᠭᠠᠯᠠ᠃ ᠠᠩᠬᠠ | ᠲᠤᠮᠳᠠᠳᠤ ᠪᠠᠨ ᠲᠡᠭᠦᠰᠬᠡᠭᠡᠳ ᠭᠦᠭᠡᠬᠤᠲᠠ ᠶᠢᠨ ᠵᠢᠷ ᠤᠨ ᠨᠢᠭᠡᠨ ᠳᠤᠮᠳᠠ ᠵᠡᠷᠭᠡ ᠶᠢᠨ ᠲᠤᠰᠬᠠᠢ ᠮᠡᠷᠭᠡᠵᠢᠯ ᠤᠨ | ᠰᠤᠷᠭᠠᠭᠤᠯᠢ ᠳᠤ ᠰᠢᠯᠭᠠᠭᠳᠠᠨ ᠣᠷᠣᠵᠤ ᠬᠦᠰᠡᠯ ᠪᠣᠯᠤᠭᠰᠠᠨ ᠭᠦᠭᠡᠬᠤᠲᠠ ᠶᠢ ᠵᠣᠷᠢᠪᠠ᠃ | ᠭᠠᠷᠠᠭ ᠤᠨ ᠡᠳᠦᠷ ᠭᠦᠭᠡᠬᠤᠲᠠ ᠶᠢᠨ ᠠᠮᠢᠳᠠᠨ ᠤ ᠬᠦᠷᠢᠶᠡᠯᠡᠩ ᠳᠤ ᠣᠴᠢᠪᠠᠯ ᠲᠡᠮᠦᠷ ᠰᠠᠷᠠᠯᠵᠢᠨ ᠳᠣᠲᠣᠷᠠ | ᠪᠠᠷᠠᠭᠠᠨ ᠵᠢᠰᠦᠮ ᠤᠨ ᠲᠦᠷᠪᠡᠨ ᠲᠡᠮᠡᠭᠡ ᠬᠠᠲᠠᠭᠰᠠᠨ ᠡᠷᠳᠡᠨᠢ ᠰᠢᠰᠢ ᠶᠢᠨ ᠰᠦᠷᠡᠯ ᠬᠡᠮᠡᠯᠢᠨ ᠵᠣᠭᠰᠣᠵᠤ ᠬᠠᠷᠠᠭᠳᠠᠯᠠ᠃ | ᠲᠠᠷᠭᠤ ᠬᠦᠴᠦ ᠠᠪᠳᠠᠭ ᠨᠠᠮᠤᠷ ᠤᠨ ᠲᠠᠩᠰᠤᠭ ᠤᠯᠠᠷᠢᠯ ᠳᠤ ᠬᠠᠭᠤᠷᠠᠢ ᠰᠦᠷᠡᠯ ᠬᠡᠮᠡᠯᠢᠵᠦ ᠵᠤᠬᠰᠤᠬᠤ ᠨᠢ ᠲᠡᠳᠦᠢ | ᠯᠡ ᠲᠠᠭᠠᠲᠠᠢ ᠰᠠᠨᠠᠭᠳᠠᠭᠰᠠᠨ ᠦᠭᠡᠢ᠃ | ᠪᠢ ᠬᠦᠷᠢᠶᠡᠯᠡᠩ ᠤᠨ ᠬᠠᠮᠢᠶᠠᠷᠤᠭᠴᠢ ᠠᠴᠠ ᠥᠪᠥᠷ ᠮᠣᠩᠭᠤᠯ ᠤᠨ ᠲᠧᠯᠸᠢᠰ ᠬᠤᠷᠢᠶᠠᠨ ᠤ ᠥᠨᠳᠥᠷ | ᠠᠰᠠᠷ ᠤᠨ ᠡᠮᠦᠨᠡᠬᠢ ᠰᠢᠨᠬᠤᠸᠠ ᠠᠭᠤᠳᠠᠮ ᠲᠠᠯᠠᠪᠠᠢ ᠳᠤ ᠲᠡᠮᠡᠭᠡ ᠪᠠᠶᠢᠳᠠᠭ ᠢ ᠲᠤᠭᠤᠯᠤᠭᠠᠳ ᠲᠡᠶᠢᠰᠢ ᠭᠦᠷᠦᠯᠡ᠃ | ᠭᠠᠭᠴᠠ ᠰᠢᠷᠠ ᠠᠲᠠᠨ ᠳᠡᠭᠡᠷᠡ ᠭᠤᠷᠪᠠᠨ ᠬᠡᠦᠬᠡᠳ ᠰᠤᠨᠳᠠᠯᠠᠨ ᠡᠵᠡᠨ ᠢᠶᠠᠷ ᠨᠢ ᠬᠥᠲᠥᠯᠥᠭᠦᠯᠦᠨ ᠰᠠᠵᠢᠯᠠᠭᠤᠯᠵᠤ | ᠪᠠᠶᠢᠨᠠ᠃ ᠳᠡᠮᠡᠢ ᠶᠠᠪᠤᠭᠰᠠᠨ ᠦᠭᠡᠢ ᠬᠠᠲᠠᠭᠤ ᠭᠥᠯᠢᠭᠡᠷ ᠱᠦᠢᠨᠢ ᠳᠡᠭᠡᠷᠡ ᠪᠤᠷᠠᠨᠲᠠᠭ ᠠᠴᠠ ᠨᠢ ᠳᠤᠭᠲᠤᠷᠤᠨ | ᠬᠡᠪᠲᠡᠭᠦᠯᠦᠭᠡᠳ ᠥᠨᠥ ᠭᠤᠷᠪᠠᠨ ᠬᠡᠦᠬᠡᠳ ᠢ ᠪᠠᠭᠤᠯᠭᠠᠲᠠᠯᠠ ᠪᠠᠰᠠ ᠨᠢᠭᠡ ᠲᠠᠷᠭᠤᠨ ᠪᠦᠰᠡᠭᠦᠢ ᠤᠨᠤᠭᠠᠳ ᠵᠢᠷᠤᠭ | ᠠᠪᠤᠭᠤᠯᠪᠠ᠃ ᠬᠥᠭᠡᠷᠦᠬᠦᠢ ᠲᠡᠷᠡ ᠰᠢᠷᠠ ᠠᠲᠠ ᠬᠤᠷᠢᠭᠠᠳᠬᠠᠨ ᠮᠢᠨᠦ᠋ᠲ ᠤᠨ ᠳᠣᠲᠣᠷᠠ ᠬᠠᠲᠠᠭᠤ ᠱᠦᠢᠨᠢ ᠱᠠᠯᠠ | ᠳᠡᠭᠡᠷᠡ ᠲᠤᠯᠤᠭᠠ ᠤᠳᠠᠭᠠ ᠬᠡᠪᠲᠡᠵᠦ ᠪᠤᠰᠬᠤ ᠨᠢ ᠳᠠᠩᠴᠤ ᠬᠥᠭᠡᠷᠦᠬᠦᠶᠢᠯᠡᠯᠲᠡᠢ ᠰᠠᠨᠠᠭᠳᠠᠪᠠ᠃ | ᠨᠢᠭᠡ ᠡᠳᠦᠷ ᠲᠤ ᠬᠡᠴᠢᠨᠡᠨ ᠴᠤ ᠤᠳᠠᠭᠠ ᠡᠶᠢᠨ ᠬᠦ ᠬᠡᠪᠲᠡᠵᠦ ᠪᠣᠰᠳᠠᠭ ᠢ ᠲᠥᠰᠥᠭᠡᠯᠡᠬᠦ ᠶᠢᠨ ᠠᠷᠭᠠ | ᠠᠯᠠᠭᠠ᠃ ᠬᠠᠲᠠᠭᠤ ᠱᠦᠢᠨᠢ ᠱᠠᠯᠠ ᠳᠡᠭᠡᠷᠡ ᠴᠠᠭ ᠦᠷᠭᠦᠯᠵᠢ ᠬᠡᠪᠲᠡᠵᠦ ᠪᠣᠰᠣᠭᠰᠠᠭᠠᠷ ᠪᠠᠶᠢᠭᠠᠳ ᠡᠪᠦᠳᠦᠭ ᠨᠢ | ᠲᠡᠮᠦᠷ ᠤᠨ ᠬᠠᠤᠷᠠᠢ ᠰᠢᠭ᠋ ᠬᠠᠲᠠᠭᠤᠷᠠᠨ ᠡᠪᠡᠷᠰᠢᠵᠡᠢ᠃ ᠭᠠᠭᠴᠠ ᠨᠢᠭᠡ ᠪᠠᠷ ᠢᠶᠠᠨ ᠤᠨᠤᠬᠤ ᠦᠭᠡᠢ᠂ ᠭᠡᠳᠦ | ᠭᠡᠳᠦ ᠪᠠᠷ ᠢᠶᠠᠨ ᠵᠥᠪ ᠪᠤᠷᠤᠭᠤ ᠦᠭᠡᠢ ᠵᠠᠶᠢᠳᠠᠯᠠᠭᠰᠠᠭᠠᠷ ᠪᠠᠶᠢᠭᠠᠳ ᠬᠤᠶᠠᠷ ᠪᠦᠭᠦ ᠨᠢ ᠬᠠᠵᠠᠭᠤ ᠲᠡᠶᠢᠰᠢ ᠪᠠᠨ ᠪᠢᠰᠢ | ᠂ ᠬᠠᠷᠢᠨ ᠬᠤᠶᠢᠰᠢ ᠪᠠᠨ ᠤᠷᠤᠭᠰᠢ ᠪᠠᠨ ᠤᠨᠠᠵᠤ ᠬᠡ ᠬᠡᠪ ᠢᠶᠠᠨ ᠠᠯᠳᠠᠭᠰᠠᠨ ᠨᠢ ᠪᠦᠷ ᠴᠦ ᠬᠥᠭᠡᠷᠦᠬᠦᠶᠢᠯᠡᠯᠲᠡᠢ | ᠠᠮᠢᠳᠠᠨ ᠪᠣᠯᠭᠠᠨ ᠬᠤᠪᠢᠷᠠᠭᠠᠵᠠᠢ᠃ ᠭᠡᠳᠦ ᠭᠤᠷᠪᠠ ᠪᠠᠷ ᠢᠶᠠᠨ ᠰᠢᠪᠠᠨ ᠪᠦᠭᠦ ᠶᠢ ᠨᠢ ᠬᠤᠶᠢᠰᠢ ᠤᠷᠤᠭᠰᠢ ᠨᠢ | ᠲᠡᠯᠡᠵᠦ ᠦᠢᠯᠡ ᠲᠠᠮᠤ ᠶᠢ ᠨᠢ ᠬᠡᠴᠢᠨᠡᠨ ᠡᠳ᠋ᠯᠡᠭᠦᠯᠦᠭᠰᠡᠨ ᠢ ᠶᠠᠭᠠᠬᠢᠨ ᠲᠥᠰᠥᠭᠡᠯᠡᠬᠦ ᠪᠤᠢ ᠳ᠋ᠠ᠃ | ᠴᠢᠨᠳᠠᠭᠠ ᠮᠢᠨᠢ ᠪᠣᠲᠣᠭᠤ ᠲᠠᠢ ᠪᠠᠨ ᠬᠤᠶᠠᠭᠤᠯᠠ ᠬᠠᠮᠢᠭᠠ ᠡᠶᠢᠨ ᠬᠦ ᠦᠢᠯᠡ ᠲᠠᠮᠤ ᠪᠠᠨ ᠡᠳ᠋ᠯᠡᠵᠦ ᠪᠠᠶᠢᠭᠠ | ᠪᠣᠯ︖ ᠭᠡᠵᠦ ᠪᠤᠳᠤᠬᠤ ᠠᠴᠠ ᠭᠤᠣᠯ ᠤᠷᠤᠭᠤ ᠭᠤᠷᠣᠶᠢᠨᠠ᠃ ᠪᠢ ᠰᠢᠷᠠ ᠠᠳᠠᠨ ᠤ ᠳᠡᠷᠭᠡᠳᠡ ᠣᠴᠢᠵᠤ | ᠬᠠᠮᠠᠷ ᠢ ᠨᠢ ᠢᠯᠢᠭᠰᠡᠨ ᠳᠤ᠂ ᠲᠡᠷᠡ ᠴᠤ ᠨᠠᠮᠠᠶᠢ ᠭᠡᠳᠦ ᠦᠨᠦᠷᠯᠡᠭᠰᠡᠨ ᠢᠶᠠᠨ ᠲᠣᠮᠣ ᠲᠣᠮᠣ ᠨᠢᠯᠪᠤᠰᠤ ᠤᠨᠠᠭᠠᠪᠠ᠃ | ᠪᠢ ᠴᠢᠨᠳᠠᠭᠠ ᠡᠬᠡ ᠪᠣᠲᠣᠭᠤ ᠬᠤᠶᠠᠷ ᠲᠤ ᠥᠭᠬᠦ ᠰᠠᠨᠠᠭᠠ ᠲᠠᠢ ᠬᠠᠷᠮᠠᠯᠠᠵᠤ ᠶᠠᠪᠤᠭᠰᠠᠨ ᠬᠡᠳᠦᠨ ᠰᠢᠷᠬᠡᠭ | ᠰᠢᠬᠢᠷ ᠢᠶᠠᠨ ᠠᠮᠠᠨ ᠳᠤᠨᠢ ᠬᠢᠭᠡᠳ ᠡᠷᠭᠢᠵᠦ ᠴᠤ ᠬᠠᠷᠠᠯ ᠦᠭᠡᠢ ᠬᠤᠯᠠᠳᠠᠪᠠ᠃ ᠨᠠᠳᠠ ᠡᠷᠭᠢᠵᠦ ᠬᠠᠷᠠᠬᠤ ᠵᠣᠷᠢᠭ | ᠳᠠᠩᠴᠤ ᠪᠠᠶᠢᠭᠰᠠᠨ ᠦᠭᠡᠢ᠃ | ᠠᠳᠡ ᠲᠡᠨᠳᠡ ᠵᠢᠭᠤᠯᠴᠢᠯᠠᠵᠤ ᠲᠣᠭᠤᠷᠢᠵᠤ ᠦᠵᠡᠭᠡ ᠦᠭᠡᠢ ᠪᠢ ᠠᠮᠢᠳᠠᠨ ᠤ ᠬᠦᠷᠢᠶᠡᠯᠡᠩ᠂ ᠵᠢᠭᠤᠯᠴᠢᠯᠠᠯ ᠤᠨ | ᠭᠠᠵᠠᠷ ᠤᠨ ᠠᠮᠢᠲᠠᠳ ᠢ ᠡᠶᠢᠮᠦ ᠵᠣᠪᠠᠭᠤᠷᠢ ᠲᠠᠢ ᠡᠳᠦᠷ ᠬᠤᠨᠤᠭ ᠥᠩᠭᠡᠷᠡᠭᠡᠳᠡᠭ ᠢ ᠵᠡᠭᠦᠳᠦᠯᠡᠭᠡ ᠴᠤ ᠦᠭᠡᠢ᠃ | ᠠᠮᠢᠳᠠᠨ ᠤ ᠬᠦᠷᠢᠶᠡᠯᠡᠩ᠂ ᠵᠢᠭᠤᠯᠴᠢᠯᠠᠯ ᠤᠨ ᠭᠠᠵᠠᠷ ᠤᠨ ᠬᠢᠨ ᠶᠠᠮᠠᠷ ᠨᠢᠭᠡᠨ ᠠᠮᠢᠳᠠᠨ ᠢ ᠠᠪᠴᠢᠷᠠᠵᠤ᠂ ᠵᠢᠭᠤᠯᠴᠢᠯᠠᠨ | ᠲᠣᠭᠤᠷᠢᠭᠰᠠᠳ ᠢ ᠪᠠᠶᠠᠷᠯᠠᠭᠤᠯᠵᠤ ᠪᠠᠶᠠᠰᠬᠠᠬᠤ ᠳᠠᠭᠠᠨ ᠲᠡᠳᠡᠭᠡᠷ ᠠᠮᠢᠲᠠᠳ ᠤᠨ ᠠᠭᠠᠰᠢ ᠠᠷᠠᠨᠰᠢᠨ᠂ ᠣᠷᠣᠰᠢᠯ | ᠲᠣᠭᠲᠠᠨᠢᠯ ᠤᠨ ᠲᠠᠯᠠ ᠪᠠᠷ ᠨᠠᠷᠢᠨ ᠰᠤᠳᠤᠯᠭᠠᠨ ᠬᠢᠵᠦ ᠠᠯᠢ ᠪᠤᠯᠬᠤ ᠪᠠᠷ ᠣᠨᠴᠠᠯᠢᠭ ᠲᠤᠨᠢ ᠵᠣᠬᠢᠴᠠᠭᠤᠯᠤᠨ᠂ ᠵᠦᠢ | ᠵᠣᠬᠢᠰᠲᠠᠢ ᠨᠥᠬᠦᠴᠡᠯ ᠪᠣᠯᠣᠮᠵᠢ ᠶᠢ ᠬᠠᠩᠭᠠᠵᠤ ᠥᠭᠪᠡᠯ ᠵᠦᠢᠲᠡᠢ ᠪᠤᠶᠤ᠃ ᠲᠡᠮᠡᠭᠡ ᠪᠠᠷ ᠠᠪᠴᠤ ᠬᠡᠯᠡᠪᠡᠯ ᠶᠠᠳᠠᠵᠤ᠂ | ᠬᠡᠪᠲᠡᠵᠦ ᠪᠤᠰᠬᠤ ᠳᠤᠨᠢ ᠲᠣᠬᠢᠷᠠᠮᠵᠢᠲᠠᠢ ᠬᠡᠰᠡᠭᠬᠡᠨ ᠵᠥᠭᠡᠯᠡᠨ ᠬᠥᠷᠥᠰᠥ ᠲᠣᠬᠢᠷᠠᠭᠤᠯᠪᠠᠯ ᠶᠠᠭᠤᠲᠠᠢ ᠰᠠᠶᠢᠬᠠᠨ ᠠᠵᠢ︕ | ᠵᠢᠭᠤᠯᠴᠢᠯᠠᠯ ᠤᠨ ᠭᠠᠵᠠᠷ ᠵᠦᠯᠭᠡ ᠲᠠᠷᠢᠨ ᠵᠥᠭᠡᠯᠡᠨ ᠬᠥᠷᠥᠰᠥ ᠶᠢ ᠣᠷᠣᠯᠠᠭᠤᠯᠤᠭᠰᠠᠨ ᠴᠦ ᠪᠣᠯᠣᠨᠠ ᠰᠢᠤ ᠳ᠋ᠠ︕ | ᠲᠡᠮᠡᠭᠡ ᠭᠡᠳᠡᠭ ᠭᠠᠶᠢᠬᠠᠯᠲᠠᠢ ᠵᠥᠩᠴᠢ ᠠᠮᠢᠳᠠᠨ ᠰᠠᠨᠵᠠᠢ᠃ ᠲᠡᠷᠡ ᠵᠢᠯ ᠤᠨ ᠬᠠᠪᠤᠷ᠂ ᠴᠢᠨᠳᠠᠭᠠ ᠡᠬᠡ | ᠪᠣᠲᠣᠭᠤ ᠬᠤᠶᠠᠷ ᠪᠠᠶᠢᠨ ᠪᠠᠶᠢᠨ ᠪᠤᠶᠢᠯᠠᠵᠤ ᠪᠠᠶᠢᠭᠰᠠᠨ ᠨᠢ ᠲᠠᠭᠢᠨ ᠰᠠᠨᠠᠭᠠᠨ ᠳᠤ ᠪᠠᠭᠤᠪᠠ᠃ ᠡᠬᠡ ᠪᠣᠲᠣᠭᠤ | ᠬᠤᠶᠠᠷ ᠬᠤᠯᠠ ᠭᠠᠵᠠᠷ ᠶᠠᠪᠤᠬᠤ ᠪᠠᠨ ᠤᠷᠢᠳᠴᠢᠯᠠᠨ ᠮᠡᠳᠡᠴᠢᠬᠡᠭᠡᠳ ᠨᠤᠲᠤᠭ ᠤᠰᠤᠨ ᠠᠴᠠ ᠪᠠᠨ ᠰᠠᠯᠵᠤ ᠶᠠᠳᠠᠨ | ᠭᠤᠨᠢᠵᠤ ᠭᠤᠳᠤᠵᠤ ᠪᠤᠶᠢᠯᠠᠵᠤ ᠪᠠᠶᠢᠭᠰᠠᠨ ᠪᠠᠶᠢᠬᠤ ᠨᠢ ᠁ ᠭᠡᠵᠦ ᠪᠤᠳᠤᠬᠤ ᠠᠴᠠ ᠰᠡᠳᠬᠢᠯ ᠰᠢᠨᠠᠯᠤᠨᠠ᠃ | ᠴᠢᠨᠳᠠᠭᠠ ᠶᠠᠪᠤᠬᠤ ᠪᠠᠨ ᠵᠥᠩᠨᠡᠵᠦ ᠴᠢᠳᠠᠭᠰᠠᠨ ᠶᠤᠮ ᠴᠢᠨᠢ ᠣᠴᠢᠬᠤ ᠭᠠᠵᠠᠷ᠂ ᠬᠤᠵᠢᠮ ᠤᠨ | ᠠᠮᠢᠳᠤᠷᠠᠯ ᠢᠶᠠᠨ ᠲᠥᠰᠥᠭᠡᠯᠡᠭᠰᠡᠨ ᠴᠦ ᠪᠠᠶᠢᠵᠤ ᠪᠤᠯᠬᠤ ᠶᠤᠮ᠃ ᠴᠢᠨᠳᠠᠭᠠ ᠪᠣᠲᠣᠭᠤ ᠲᠠᠢ ᠪᠠᠨ ᠪᠡᠯᠴᠢᠭᠡᠷ ᠠᠴᠠ | ᠪᠤᠴᠠᠵᠤ ᠶᠠᠪᠤᠬᠤ ᠳᠠᠭᠠᠨ᠄ ︽ᠮᠢᠨᠤ ᠬᠠᠶᠢᠷᠠᠲᠤ ᠦᠷᠡ ᠮᠢᠨᠢ᠂ ᠮᠠᠷᠭᠠᠰᠢ ᠬᠤᠶᠠᠭᠤᠯᠠ ᠪᠠᠨ ᠡᠨᠡ ᠰᠠᠶᠢᠬᠠᠨ | ᠨᠤᠲᠤᠭ ᠢᠶᠠᠨ ᠣᠷᠭᠢᠭᠠᠳ ᠬᠤᠯᠠ ᠶᠢ ᠵᠣᠷᠢᠨᠠ᠃ ᠴᠡᠪᠡᠷ ᠠᠭᠠᠷ ᠢ ᠨᠢ ᠠᠭᠤᠵᠢᠷᠠᠲᠠᠯᠠ ᠪᠠᠨ ᠠᠮᠢᠰᠬᠤᠯᠯᠠᠵᠤ᠂ | ᠲᠡᠭᠷᠢ ᠶᠢᠨ ᠬᠠᠶᠠᠭᠠ ᠶᠢ ᠲᠡᠨᠢᠢᠲᠡᠯᠡ ᠨᠢ ᠪᠠᠷᠠᠯᠠᠭᠠᠳ ᠨᠢᠳᠦᠨ ᠤ ᠴᠡᠴᠡᠭᠡᠢ ᠰᠢᠭ ᠢᠶᠠᠨ ᠰᠡᠳᠬᠢᠯ ᠳᠡᠭᠡᠨ ᠮᠥᠩᠬᠡᠯᠡᠶᠡ | ︕︾ ᠭᠡᠵᠦ ᠪᠤᠶᠢᠯᠠᠯᠴᠠᠨ᠂ ᠦᠨᠡᠰᠦᠨ ᠳᠡᠭᠡᠷᠡ ᠨᠠᠯᠠᠬᠤ ᠳᠠᠭᠠᠨ ︽ᠬᠤᠵᠢᠮ ᠪᠢᠳᠠ ᠬᠤᠶᠠᠷ ᠲᠤ ᠶᠠᠳᠠᠷᠠᠭᠠ ᠪᠠᠨ | ᠲᠠᠶᠢᠯᠲᠠᠯᠠ ᠨᠠᠯᠠᠬᠤ ᠡᠶᠢᠮᠦ ᠵᠥᠭᠡᠯᠡᠨ ᠬᠥᠷᠥᠰᠥ ᠬᠡᠵᠢᠶᠡ ᠴᠤ ᠣᠯᠳᠠᠬᠤ ᠦᠭᠡᠢ᠃ ᠬᠠᠨᠲᠠᠯᠠ ᠪᠠᠨ ᠨᠠᠯᠠᠵᠤ | ᠲᠡᠨᠢᠢᠲᠡᠯᠡ ᠪᠠᠨ ᠰᠤᠨᠢᠶᠠᠨ ᠠᠷᠠᠰᠤ ᠮᠢᠬᠠᠨ ᠳᠠᠭᠠᠨ ᠰᠢᠩᠭᠡᠲᠡᠯᠡ ᠰᠠᠨᠠᠵᠤ ᠮᠥᠷᠥᠭᠡᠳᠴᠦ ᠶᠠᠪᠤᠵᠠᠭᠠᠶᠠ᠂ | ᠬᠤᠶᠠᠭᠤᠯᠠ ᠪᠠᠨ︕︾ ᠬᠡᠮᠡᠨ ᠭᠤᠩᠭᠠᠨᠢᠯᠳᠤᠵᠤ᠂ ᠬᠤᠳᠳᠤᠭ ᠳᠡᠭᠡᠷᠡ ᠤᠰᠤ ᠤᠤᠭᠤᠬᠤ ᠳᠠᠭᠠᠨ ︽ᠡᠶᠢᠮᠦ | ᠠᠮᠢᠳᠤ ᠲᠤᠩᠭᠠᠯᠠᠭ ᠷᠠᠰᠢᠶᠠᠨ ᠢ ᠲᠠᠮᠰᠢᠶᠠᠯᠠᠨ ᠲᠠᠮᠰᠢᠶᠠᠯᠠᠨ ᠤᠮᠳᠠᠯᠠᠵᠤ᠂ ᠦᠬᠦᠨ ᠦᠬᠦᠲᠡᠯᠡ ᠪᠠᠨ ᠠᠷᠠᠭᠠᠨ ᠳᠠᠭᠠᠨ | ᠰᠢᠩᠭᠡᠬᠡᠨ ᠠᠭᠤᠰᠬᠠᠵᠤ ᠶᠠᠪᠤᠵᠠᠭᠠᠶᠠ︕︾ ᠬᠡᠮᠡᠨ ᠮᠡᠯᠮᠡᠷᠡᠭᠦᠯᠵᠦ ᠪᠠᠶᠢᠭᠰᠠᠨ ᠶᠤᠮ ᠪᠢᠵᠡ ᠠ᠋⁈ | ᠴᠢᠨᠳᠠᠭᠠ᠂ ᠪᠣᠲᠣᠭᠤ ᠬᠤᠶᠠᠷ ᠤᠨ ᠨᠤᠲᠤᠭ ᠤᠰᠤᠨ ᠠᠴᠠ ᠪᠠᠨ ᠰᠠᠯᠬᠤ ᠦᠶᠡ ᠶᠢᠨ ᠰᠡᠳᠬᠢᠯ ᠤᠨ ᠭᠤᠨᠢᠭ | ᠳᠣᠭᠳᠣᠯᠤᠯ ᠢ ᠡᠳᠦᠶᠢᠬᠡᠨ ᠢᠶᠠᠷ ᠶᠠᠭᠠᠬᠢᠨ ᠬᠡᠮᠵᠢᠶᠡᠯᠡᠬᠦ ᠪᠢᠯᠡ ᠳ᠋ᠠ᠃ ᠠᠳᠤᠭᠤᠰᠤ ᠠᠮᠢᠲᠠᠨ ᠤ ᠰᠡᠳᠬᠢᠬᠦᠢ ᠳᠤ | ᠡᠭᠦᠨ ᠠᠴᠠ ᠴᠤ ᠢᠯᠡᠭᠦᠦ ᠬᠠᠶᠢᠷᠠ ᠰᠡᠳᠬᠢᠯᠭᠡ ᠪᠠᠶᠢᠳᠠᠭ ᠢ ᠦᠭᠡᠶᠢᠰᠭᠡᠭᠦ ᠶᠢᠨ ᠠᠷᠭᠠ ᠦᠭᠡᠢ᠃ | ᠬᠡᠷᠪᠡ ᠪᠢ ᠶᠢᠰᠦᠨ ᠭᠡᠯᠡ ᠮᠡᠳᠡᠳᠡᠭ ᠰᠠᠨ ᠪᠣᠯ ᠁ | | |